وش حالة العيد لامن غاب لك غالي

وش حالة العيد لامن غاب لك غالي
واقفى مع الوقت والأقدار والقدرة

ياليلة العيد وش بيصير في حالي
لافرحوا الناس حزة عيدهم بكرة

وشلون بفرح وانا بالعيد بالحالي
هم ثقيل على العشاق ياكبره

لاغاب عني حبيبي ويش يبقالي
وش فرحة العيد لاماضمني صدره

لاشفت زوله نهار العيد يحلى لي
يرتاح بالي واعل الروح من عطره

واليوم غايب وهو ماغاب عن بالي
في ليلة العيد زادة حسرتي حسرة

خلوني اسج مع همي وغربالي
واقضي العيد بالحسرات والعبرة

عن ضيقة الخلق لاتشقون عذالي
قلبي عن العيد وافراحه معه عذره

ياحظ منه عن دروب الهوى سالي
ماهمه الحب لاكسره ولاجبره

للشاعر /خالد التميمي