قصيدة في كارثة جلاجل عام 97هـ

السلام عليكم ورحمه الله وبركاته
صباحكم ومسائكم
خير وصحه وسلام
وفي سنة ( 1397هـ ) كانت مدرسة البنات في ( جلاجل ) تحتل داراً قديمة تُنذِرُ بالسقوط ، فصبرت على التسويف والمماطلة من قِبَلِ من يهمهم الأمر في تعليم البنات ووزارة المال ... إلا أنه أدركها السقوط قبل أن يدرك هؤلاء الشعور بالمسؤلية ، فكان ضحيتها سبع عشرة بنتاً .


قصيده رائعه كلما قراتها تذكرت تلك الحادثه التي سمعتها من قبل وللامانه القصيده تشعرك بالحدث ووقع المصيبه وبالفعل صور لنا المشهد رحم الله قائلها ورحم الله الجميع
احببت ان انقلها لكم
لاني تذكرتها


واعلم ان مكانها ليس هنا وليعذرني مشرفي القسم الاحباء
ولكن لتصل الى الاغلبيه
نسأل الله ان يحفظ جلاجل واهلها وديار سدير وديار المسلمين


نبداء بالمنقول





الشاعر محمد بن عبد العزيز الحجي رحمه الله واسكنه فسيح جناته الذي قال قصيدة في المصيبة اللي حلت بأهل جلاجل عندما سقطت مدرسة البنات لديهم في وقت الدراسة قبل حوالي 26 سنة .. وقد حزن أهل جلاجل حزناً شديداً وتوفي في المدرسة حوالي 16 بنت .. وقام الأمير سطام بن عبدالعزيز بالحضور الى جلاجل وعزا الأسر وقام الملك خالد - رحمه الله - بالعزاء في الأخبار وهذه هي قصيدة أبو حجي رحمه الله :







يالله ياجابر عـزى كـل مصيـوب يامن جمعت شمل يوسـف ويعقـوب




يامنفـذ ماكـان باللـوح مكـتـوب تجبـر جـروح بالضمايـر خفيـات




جروح ماهي في ضميـري لحالـي عمت جميع الشعـب هـم والاهالـي




ماشفت من لايرفع الصـوت عالـي كـل يقـول انـا استحـق المواسـاة




ياجابـر المكسـور تجبـر عـزانـا وتجلي همـوم خيمـت فـي سمانـا




مصيبـه منـهـا بقيـنـا حـزانـا مصيبـة حلـت علـى هالبنـيـات




ماهـن لاوحـده ولا هـن ثنتـيـن ستة عشـر بنـت بـزور مساكيـن




جتهن منيتهـن وهـم غيـر داريـن اضف الـى ذلـك ثمـان جريحـات




في حادث جلاجل تصورت ماصـار كنا بيوم يشخصـن فيـه الابصـار




يوم القيامه يـوم ضيعـات الافكـار الخلـق كـل يطلـب الله سلامـات




الرابح اللي ماحضر يـوم الا ثنيـن بشهر محـرم عـام سبـع وتسعيـن




ياسعد منهم عـن جلاجـل بعيديـن ماشافو اللي صار في عشر ساعـات




ماشاف عجـز يركضـن بالشـوارع كثير منهن كاشـف الـراس فـارع




تغطـي الرجليـن والوجـه طـالـع تنشد عن اللي مـن نسبهـا قريبـات




ولا شاف شيبـان هـزال مساكيـن اعمارهم في حدود خمـس وتسعيـن




من كل فج وصوب بالـدرب ماشيـن سلامهم من حي منهـن ومـن مـات




باقي هـل الديـره رجـال ونسـوان متخالطيـن وقتهـا مثـل الاخـوان




الكل منهـم سـارح الفكـر مشتـان ماتسمع الا اصوات حزن وصيحـات




والله لـو شفـت التريكـي مسيكيـن والا ابن فايز لامسـح دمعـه العيـن




وابو دغش وابـن سليمـان وحسيـن الكل منهم هيـض النـاس عبـرات




من سمـع بالحـادث تكـدر طعامـه ولا مشـى يخثـع تخونـه عظامـه




تلقاة يمشـي ماعـرف وش مرامـه هايم على وجهه وها الناس زفـلات




صاح الصياح وصاح الاسعاف بالبوق وجانا الفزع من كل فـج وطـاروق




كأن واحدهم مـع الـدرب ملحـوق قصده يبي يلحق مع الناس فزعـات




وكيل امير المجمعـه مالـه اجنـاس اقبل على الحادث بتفكيـر واحسـاس




من يوم سمع الكارثه حرض النـاس يزهم على ماكان شرطـه ونجـدات




وصلوا هل النجده بعد نصف ساعـه من شاف ممشاهم مع الخـط راعـه




كـأن واحدهـم يــدور طمـاعـه قصده يبي يلحق مع الناس فزعـات




جونا من الحوطه رجـال المطافـي رجالهـم فـي شغلـتـه مايخـافـي




رئيسهم فـي كـل الاعمـال وافـي في حضرته ذلل جميـع الصعوبـات




ومطافي اهل المجمعه مابـه قصـور انا اشهد ان رئيسهـم درب صقـور




كل بـذل مجهـود والكـل مشكـور واهل الهلال ابـدوا جهـود كبيـرات




امـا العـلاوي بـاذل كـل مجهـود عسى جزاه من الولي راعي الجـود




لعـل مـاسـواه يلـقـاه مـوجـود يجزاه رب العرش والـي السمـوات




برقيه العاهل جلـت كـل الاحـزان وولي عهـده زادت القلـب بايمـان




وابا حسين ويوسـف بـن حميـدان جتنا التعازي بالصحـف والمجـلات




غطى على ماكـان بالكـون سطـام للخيـر فـعـال وللـشـر لـطـام




واسى جميع اللي من الحادث انضـام والله يجازيـه الفـرح والمـسـرات




وقف على الحـادث برجلـه وشافـه وهلت دمـوع العيـن منـه بكثافـه




ودلـى يعـزي فـي هدواولطـافـه يقول هـذي مـن كبـار الفزيعـات




صورت ماشاهدت بالفعـل تصويـر ولا صار في ماقلـت زود وتزويـر




ارجي السموحه كان بالقول تقصيـر وختامهـا منـي سـلام وتحـيـات






الله يرحمهن ويسكنهن فسيح جناته

ماشاف عجـز يركضـن بالشـوارع كثير منهن كاشـف الـراس فـارع




تغطـي الرجليـن والوجـه طـالـع تنشد عن اللي مـن نسبهـا قريبـات


الله لايفجعنا
صدق فجيعة الله يغفر لهن